Ish-deputeti i Partia Demokratike, Ervin Salianji, ka deklaruar se në një garë të hapur do të arrinte të fitonte ndaj kreut të demokratëve, Sali Berisha.
Gjatë një interviste në emisionin “Studio24”, Salianji kritikoi drejtimin e partisë nga Berisha, duke e akuzuar se po e përdor PD-në për interesa personale. Ai u ndal edhe te përjashtimi i tij nga gara për drejtimin e partisë, duke kërkuar publikisht një vendim zyrtar që të shpjegojë arsyet e skualifikimit.
Salianji tha se ende nuk ka marrë një shpjegim formal për këtë vendim dhe e cilësoi procesin të padrejtë. Sipas tij, mënyra se si u trajtua ndikoi edhe në pjesëmarrjen e ulët në protestat e opozitës.
Ai shtoi gjithashtu se Berisha, për shkak të problemeve me drejtësinë dhe nivelit të pakënaqësisë brenda elektoratit demokrat, nuk mund ta çojë Partinë Demokratike drejt fitores. Sipas Salianjit, ai do të vazhdojë angazhimin e tij politik pavarësisht përjashtimit nga gara.