TIRANË– Efektivi Erion Goxhara i cili plagosi me gjashtë plumba shtetasin Lorenc Kosta, pasi kishte dyshime se bashkëshortja e tradhtonte me të, pas ngjarjes e ka xhiruar me celular të plagosurin dhe videon ja ka dërguar kunatit të tij.
Siç raporton Euronews, me t’u larguar nga vendi ku la të plagosur Lorenc Kostën, polici ka telefonuar djalin e tij duke i kërkuar ta priste tek rrethi i Shkozës, ku pasi kanë marrë një taksi kanë lëvizur drejt zonës së Freskut.
Rrugës në taksi, hetimet zbulojnë se efektivi Goxhara ka biseduar në telefon me drejtues policie duke refuzuar të dorëzohet. Madje ai është shprehur se ‘më mirë vras veten se të kalbem në burg’.
Efektivi në Drejtorinë Vendore për Kufirin dhe Migracionin në Tiranë, akuzohet për kryerjen e veprave penale “Vrasja me paramendim”, mbetur në tentativë dhe “Mbajtja pa leje dhe prodhimi i armëve, armëve shperthyese dhe i municionit”.