Që nga pushtimi i Ukrainës, Kremlini është përballur me tensione diplomatike në nivel ndërkombëtar. Tani Rusia është vendi i parë që njeh qeverinë talebane të Afganistanit, e cila mbetet kryesisht e izoluar.
Rusia është bërë vendi i parë në botë që njeh qeverinë talebane të Afganistanit, pothuajse katër vjet pasi ajo u rikthye në pushtet. “Shpresojmë që akti i njohjes zyrtare të Qeverisë së Emiratit Islamik të Afganistanit do të nxisë zhvillimin e bashkëpunimit produktiv dypalësh”, deklaroi ministria e Jashtme Ruse.
Islamistët e quajnë njohjen “historike”
Moska ka deklaruar se dëshiron gjithashtu të mbështesë Kabulin në luftën kundër terrorizmit dhe trafikimit të drogës. Ministria e Jashtme e Talebanëve ka folur për një “hap historik” për marrëdhëniet midis dy vendeve. Sipas islamistëve, Rusia shërben si një shembull i mirë për shtetet e tjera.
Që kur Talebanët morën përsëri pushtetin në vitin 2021, gratë në Afganistan i janë nënshtruar një shtypjeje masive.
Që kur rimorën pushtetin në gusht 2021, talebanët janë përballur me kritika ndërkombëtare, veçanërisht për shkeljen masive të të drejtave të grave, dhe konsiderohen kryesisht të izoluar. Megjithatë, vendet fqinje mbajnë një marrëdhënie më pragmatike me islamistët.
Putin flet për “aleatë”
Federata Ruse dhe qeveria e Kabulit janë afruar kohët e fundit. Duke hequr Talebanët nga lista e “organizatave terroriste”, Moska bëri një hap të parë drejt normalizimit të marrëdhënieve. Në korrik 2024, Presidenti rus Vladimir Putin madje shkoi aq larg sa i quajti talebanët “aleatë në luftën kundër terrorizmit”.
Rusia ishte gjithashtu vendi i parë, që hapi një zyrë përfaqësimi në Kabul pasi Talebanët morën pushtetin. Moska nuk po përqendrohet vetëm në marrëdhëniet diplomatike, por edhe në ato ekonomike. Kremlini ka deklaruar se dëshiron ta përdorë Afganistanin si një pikë kalimi tranziti për furnizimin me gaz natyror në Azinë Juglindore.
Deri tani, asnjë vend tjetër nuk e ka njohur zyrtarisht qeverinë e Talebanëve. Megjithatë, Kina, Emiratet e Bashkuara Arabe (EBA), Uzbekistani dhe Pakistani kanë dërguar ambasadorë në Kabul, gjë që shihet si një hap drejt njohjes./REL