TIRANË-Këngëtarja e mirënjohur Rozana Radi e cila ishte kokë më kokë në finale me Gjestin, nuk mundi ta rrëmbejë çmimin e madh.
Megjithatë artistja doli nga “Big Brother VIP Albania 4” si një ndër personazhet më të dashura dhe më të komentuara të këtij sezoni.
Rozana arriti deri në finalen e madhe, duke u renditur e dyta, një arritje që e përjetoi me krenari dhe sportivitet.
Pas shpalljes së fituesit, Rozana u shpreh se ishte e lumtur për triumfin e Gjestit. “Jam shumë e lumtur që fitoi ai. Ishte një djalë i sinqertë dhe i drejtë gjatë gjithë rrugëtimit.”- deklaroi Rozana për publikun menjëherë pas mbylljes së spektaklit.
Kujtojmë se në 120 ditë qëndrim në shtëpinë e BBV4, Rozana Radi dha maksimumin si konkurrente dhe si personazh publik, duke u treguar e drejtpërdrejtë, e ndjeshme dhe pa filtra. Ajo krijoi lidhje të forta me disa banorë, por gjithashtu nuk ngurroi të përballej me situata të vështira dhe debate.
Publiku e vlerësoi për qëndrueshmërinë, karakterin dhe mënyrën e saj autentike të të qenit, gjë që e çoi deri në fund të kësaj aventure, duke i dhënë asaj një tjetër dimension në karrierën dhe jetën personale. Rozana mund të mos ketë fituar kupën, por doli nga kjo eksperiencë si një ndër figurat më të vlerësuara të sezonit, duke lënë një gjurmë të fortë në këtë edicion të BBVIP.