Qendra Kombëtare Operacionale e Emergjencave Civile (QKOEC) raporton se gjatë ditës së sotme, më 25 gusht 2025, janë regjistruar 10 vatra zjarri në vend, prej të cilave 6 janë shuar, ndërsa 4 mbeten aktive.
Në Pishë-Poro të Vlorës, zjarri ka përfshirë një terren ranor në fshatin Delisuf të njësisë administrative Novoselë. Era e fortë ka favorizuar përhapjen e flakëve drejt fshatit Pishë-Poro, ndërsa terreni i vështirë nuk lejon ndërhyrjen me mjete zjarrfikëse. Në zonë janë angazhuar 3 automjete zjarrfikëse me 12 efektivë, 4 forca AdZM dhe 10 forca bashkiake, ndërsa në mbështetje kanë fluturuar katër helikopterë, dy nga Forca Ajrore shqiptare dhe dy nga Emiratet e Bashkuara Arabe.
Vatrat aktive ndodhen edhe në:
Parkun Natyror Gërmenj, Leskovik, Kolonjë, ku zjarri është riaktivizuar pranë piramidës 15.
Fshatin Pezë Helmës, njësia Pezë, Tiranë, në një terren me bimësi të dendur dhe pa rrugëkalime. Zjarrfikësit lokalë janë në gatishmëri 24 orë pranë banesave më të afërta.
Fshatin Bogovë, njësia Bogovë, Skrapar, ku një vatër në një hangar është përhapur në një sipërfaqe pyjore me pishë. Situata raportohet nën kontroll dhe pa rrezik për banesat.
Ndërkohë, 6 vatra janë shuar plotësisht në:
Krenze, Shtiqën, Kukës
Reç, Shkrel, Malësi e Madhe
Bisht-Kamëz, Katund i Ri, Durrës
Ishull-Shëngjin, Shëngjin, Lezhë
Lagjen 18, Rajoni Nr.1, Korçë
Zona e Shkozës, Njësia Nr.1, Tiranë
Autoritetet bëjnë apel për vigjilencë dhe përkujdesje të shtuar nga qytetarët, ndërsa operacionet e shuarjes së zjarreve vazhdojnë në terren.