Rey Manaj po kalon një moment të artë në karrierë, duke vazhduar të shkëlqejë si me Kombëtaren shqiptare, ashtu edhe me klubin e tij në Emiratet e Bashkuara Arabe.
Pas golit të rëndësishëm ndaj Serbisë në kualifikueset e Botërorit 2026, sulmuesi kuqezi ka gjetur sërish rrjetën, këtë herë në kampionat me fanellën e Al Sharjah.
Në ndeshjen e javës së 6-të kundër Al Dhafra, Manaj realizoi një gol të bukur në fundin e pjesës së parë, pas një goditjeje të fortë nga krahu i majtë që mposhti portierin kundërshtar dhe vulosi rezultatin 2-0 për skuadrën e tij.
Ky është goli i dytë sezonal për Manajn në kampionatin e Emirateve, që duket se ka rifituar besimin dhe formën e tij më të mirë.