Reshjet e dendura të ditëve të fundit kanë shkaktuar dëmtime në një pjesë të skarpatës së Unazës së Pogradecit, duke krijuar rrezik për rënie gurësh në segmentin hyrës të saj.
Bashkia Pogradec njofton se, për arsye sigurie, është bllokuar përkohësisht qarkullimi në hyrjen e Unazës kur vjen nga Qafë Thana drejt qytetit. Bëhet fjalë vetëm për këtë pikë hyrëse, ndërsa pjesa tjetër e Unazës vijon të mbetet e aksesueshme.
Ekipet e punonjësve ndodhen në terren dhe do të vijojnë edhe gjatë ditës së nesërme punimet për stabilizimin e skarpatës dhe largimin e çdo rreziku potencial.
Rihapja e segmentit do të bëhet në një moment të dytë, pasi të jenë kryer të gjitha ndërhyrjet e nevojshme dhe të garantohet plotësisht siguria e kalimtarëve dhe automjeteve.