Gjatë seancës plenare të sotme në Kuvend, një debat me tone ironike dhe replika personale u zhvillua mes zv.kryeministres Belinda Balluku dhe deputetit të Partisë Demokratike, Klevis Balliu.
Përplasja nisi kur Balluku, e ndërprerë nga Balliu gjatë fjalës së saj, iu drejtua me batutën: “Pusho ti o bukurosh!”. Reagimi i menjëhershëm i Balliut ndezi shkëmbimin verbal.
“Unë bukurosh kam lindur, ndërsa ty të kanë bërë të bukur paratë e shqiptarëve,” deklaroi Balliu, duke e akuzuar zv.kryeministren për abuzime në tendera publikë, përfshirë projektet e njohura si “Tigrat” në Vlorë dhe ndërtimin e rrugëve me kosto shumë të lartë. Ai theksoi se “në vendin më të varfër të Europës, është ndërtuar kilometri më i shtrenjtë në botë, me 25 milionë euro”.
Balluku iu përgjigj me ironi, duke thënë se “problemi është që ai ka filluar ta besojë se është bukurosh” dhe shtoi: “Ne andej nga fisi jemi të bukur përgjithësisht dhe nuk na është dashur asnjë lekë për ndërhyrje.”
Debati u shoqërua me replika të ndërsjella dhe sarkazëm, duke zhvendosur për disa minuta vëmendjen nga temat politike në goditje personale mes dy përfaqësuesve politikë.
REPLIKAT
Klevis Balliu: Zonja Balluku e para faleminderit për fjalën bukurosh. Unë bukurosh kam lindur, kurse ty bukurosh të bënë paratë e shqiptarëve. Ti do bëje mirë këtu që të na flisje për tigrin 1 dhe tigrin 3, do të bëje mirë që të na flisje që në vendin më të varfër të Europës, ke sjellë kilometrin më të shtrenjtë të botës, 25 milionë euro. E ke bërë vetëm ti. Vjen në vendin më të varfër të Europës me 40 mijë lekë ndihmën ekonomike dhe me 25 milion euro kilometrin dhe rrugët të shkatërrohen më një shi. Duhet të flasësh për këto, për bukuroshët gjej kohëve tënde, jo këtu në Parlament.
Belinda Balluku: Problemi është që ky filloi të besojë që është bukurosh, kjo është me keqja. Dhe pa qenë bukurosh e çfarë nuk thoshte kurse me këtë epitetin do të çmendet fare. Unë çuditesha se përse ti mërziteshe kur të përmendej emri i babait, por mund të pyesësh edhe Fariun edhe Jetën, kurse ne andej nga fisi jemi të bukur përgjithësisht dhe nuk na është dashur asnjë lekë.