Reperi i njohur Sean Kingston, i njohur për hitet ndërkombëtare si “Beautiful Girls”, “Fire Burning” dhe “Take You There”, është dënuar me tre vite e gjysmë burg federal pas shpalljes fajtor për një skemë mashtrimi që kapte vlerën e mbi një milion dollarë.
Emri i tij i vërtetë është Kisean Anderson, dhe ai u gjykua së bashku me nënën e tij, Janice Turner, e cila u dënua më parë me pesë vite burg. Sipas prokurorëve, dyshja përdorte statusin e reperit për të bindur viktimat që t’u jepnin mallra luksoze, përfshirë orë të shtrenjta, një televizor LED gjigant prej 232 inçësh, një Cadillac Escalade të blinduar dhe mobilie, duke i marrë ato pa asnjë pagesë të ligjshme.
Metoda e përdorur nga Kingston dhe nëna e tij ishte e thjeshtë, por efektive: ata premtonin se do t’i promovonin mallrat në rrjetet sociale ose tek të famshëm të tjerë me profil të lartë. Në momentin e pagesës, dërgonin mandate bankare të falsifikuara, duke bërë që shumica e viktimave të mos merrnin kurrë paratë e tyre.
Një provë kyçe gjatë gjykimit ishin mesazhet mes Kingston dhe nënës së tij, ku flitej hapur për mandatet false. Në një prej tyre, reperi shkruante: “Të thashë të bësh një mandat të rremë”.
Në seancë, Kingston kërkoi falje para gjykatës dhe theksoi se kishte nxjerrë mësime nga veprimet e tij. Avokati i tij, Zeljka Bozanic, e përshkroi reperin si një njeri që u rrit në varfëri dhe që u bë i famshëm brenda natës, duke shtuar se ai ende kishte mentalitetin e një adoleshenti dhe nuk dinte si të menaxhonte financat e tij.
Arrestimi i Kingston ndodhi në vitin 2024 pranë Fort Lauderdale në Florida, në prag të një performance në një bazë ushtarake në shkretëtirën Mojave. Policia sekuestronte shtëpinë e tij dhe ndalonte edhe nënën e tij, duke zbuluar dokumente dhe prova që lidheshin me skemën e mashtrimit.
Tani, reperi do të nisë menjëherë vuajtjen e dënimit, duke e bërë këtë kapitull të karrierës së tij një nga më të errëtat në jetën e një prej yjeve të muzikës pop dhe reggae.