Brandi i njohur sportiv “Adidas” hoqi dorë nga fushata me modelen e njohur Bella Hadid pas reagimeve të ashpra ndaj saj.
Kompania njoftoi se do të “rishikojë” reklamën e saj të fundit ku paraqitej modelja për të nderuar përvjetorin e 52-të të Lojërave Olimpike të Mynihut.
Gjatë Lojërave Verore të vitit 1972, 11 atletë izraelitë dhe një polic gjerman u vranë nga një grup militant palestinez. Adidas kërkoi falje për referencën “e paqëllimshme” të sulmit terrorist në një deklaratë.
“Ne jemi të vetëdijshëm se janë krijuar lidhje me ngjarje tragjike historike – megjithëse këto janë krejtësisht të paqëllimshme – dhe kërkojmë falje për çdo shqetësim të shkaktuar” tha marka.
“Si rezultat ne po rishikojmë pjesën e mbetur të fushatës. Ne besojmë në sportin si një forcë bashkuese në mbarë botën dhe do të vazhdojmë përpjekjet tona për të mbrojtur diversitetin dhe barazinë në çdo gjë që bëjmë.”
Reklama u lançua ditën e enjte, me foton e 27-vjeçares që shfaqet duke buzëqeshur teksa mban lule në duar.
Fotot e Hadid, e cila ka qenë një mbështetëse e Palestinës në mes të luftës Izrael-Hamas, duke modeluar atletet janë hequr nga platformat e mediave sociale të Adidas.
Hadid është gjysmë palestineze, pasi babai i saj, Mohamed Hadid, lindi në Nazaret në vitin 1948 – në të njëjtin vit kur 750,000 palestinezë u zhvendosën nga shtëpitë e tyre – dhe u bë refugjat në Siri.