Shqetësim për Shëndetin Publik: në Maryland, SHBA, është regjistruar rasti i parë njerëzor i mizës parazitare “krimb-vidhë e Botës së Re”, një insekt i rrezikshëm që depërton indet e gjalla duke depozituar larva në plagë të hapura.
Sipas Andrew Nixon, zëdhënës i Departamentit të Shëndetësisë dhe Shërbimeve Njerëzore të SHBA-së (HHS), personi i infektuar ishte kthyer nga El Salvadori, një zonë e prekur nga kjo sëmundje. Nixon shtoi se rreziku për popullatën në SHBA konsiderohet shumë i ulët.
“Miza krimb-vidhë e Botës së Re është një specie parazitare me origjinë nga Amerika, e cila ushqehet duke depërtuar në indet e gjalla të viktimave,” tha Nixon, duke sqaruar natyrën e rrezikshme të infeksionit.
SHBA-të e kishin zhdukur këtë lloj mize në vitet 1960, ndërsa një shpërthim i vogël në bagëti në Florida në vitin 2017 u menaxhua me sukses. Megjithatë, ky rast nënvizon rëndësinë e monitorimit të udhëtimeve ndërkombëtare dhe vigilencës ndaj sëmundjeve parazitare.