Deputeti britanik Nigel Farage ka sulmuar ashpër Shqipërinë dhe kryeministrin Edi Rama, në kuadër të debatit për emigrantët shqiptarë në Britani. Në një deklaratë për The Telegraph, Farage pretendoi se “një në 50 shqiptarë që jetojnë në Britani janë në burg”, duke akuzuar Ramën për hipokrizi dhe mungesë bashkëpunimi në rikthimin e emigrantëve të dënuar.
“Ai na përqesh për Brexit-in dhe thotë se Britania është në një vend të errët, duke kërkuar ku të hedhë emigrantët. Por, një në 50 shqiptarë në Britani janë në burg. Trego vullnet të mirë dhe merrini mbrapsht nesër!”, tha Farage.
Kryeministri Rama iu përgjigj menjëherë me ironi dhe një sfidë publike. Ai e akuzoi Farage-n për manipulim të të dhënave dhe për retorikë alarmiste, tipike sipas tij për politikat post-Brexit.
“Të dy e çmojmë ‘vullnetin e mirë’ dhe jemi alergjikë ndaj ‘hipokrizisë’. Prandaj kam një ofertë: të sjellim të dy shifrat tona në tryezë. Nëse pretendimi yt del i vërtetë, unë angazhohem t’i marr të gjithë mbrapsht. Por nëse jo, nuk dua ndjesë. Thjesht do të vish në Shqipëri si i ftuari im i nderit”, u shpreh Rama.
Ai theksoi se statistika e përmendur nga Farage nuk mbështetet në fakte reale dhe se, edhe sipas të dhënave britanike, shkalla e kriminalitetit të shqiptarëve në Mbretërinë e Bashkuar nuk është më e lartë se ajo e popullsisë vendase — përkundrazi, në disa raste është më e ulët.
Kjo përplasje vjen në vijim të refuzimit të përsëritur të Shqipërisë për të pranuar ngritjen e kampeve të emigrantëve, siç kanë kërkuar më herët qeveritë britanike nën drejtimin e Rishi Sunak dhe tani Keir Starmer — kërkesë që Rama e ka konsideruar të papranueshme dhe poshtëruese.