Kryeministri Edi Rama deklaroi nga Asambleja e PS-së në Elbasan se opozita do të kishte bllokuar procesin e integrimit europian, nëse mazhoranca nuk do të kishte siguruar 83 mandatet në Kuvend.
Rama e cilësoi opozitën “një katastrofë ambulante”, ndërsa tha se shumë prej ligjeve të kërkuara nga Bashkimi Europian janë miratuar falë forcës së numrave në Parlament.
“Po të kishim 75 mandate dhe të tjerët me molotovarët, negociatat do të ishin bllokuar. Parlamentit do t’i vihej kyçi me buzëqeshje dhe justifikime politike”, u shpreh Rama.
Kreu i qeverisë tha se deri tani janë miratuar 27 ligje të lidhura me negociatat me BE-në, ku 7 prej tyre kanë kërkuar minimumin prej 84 votash.
Ai shtoi se qytetarët i dhanë PS-së votat jo për “karriget”, por për forcën e nevojshme politike që të çojë përpara negociatat dhe ta bëjë realitet anëtarësimin e Shqipërisë në Bashkimin Europian.