Kryeministri Edi Rama ka shpallur nisjen e fazës së dytë të projektit “Rilindja Urbane”, duke e cilësuar atë jetike për Shqipërinë e vitit 2030 në BE. Nga Thethi, ku ka nisur pastrimi i mbetjeve inerte pas shembjes së ndërtimeve pa leje, Rama publikoi pamje dhe theksoi se forcat e xhenjos do të qëndrojnë në terren deri në largimin e fundit të mbetjeve.
Sipas tij, në këtë zonë janë shembur mbi 100 ndërtime pa leje, përfshirë struktura metalike, me dru apo me mure, të cilat cilësohen si një “dhunim ekstrem i ligjit për zonat e mbrojtura” dhe pengesë për zhvillimin e qëndrueshëm të turizmit.
Rama shtoi se mbetet vetëm një godinë masive për t’u shembur, duke e cilësuar këtë si përmbylljen e plotë të operacionit të IKMT në Theth.
“Ka filluar Rilindja Urbane 2.0 si domosdoshmëri jetike për Shqipërinë 2030 në BE”, shkroi kreu i qeverisë, duke e lidhur aksionin me një projekt të gjerë transformues për standardet urbane dhe turistike të vendit.