Kryeministri Edi Rama ka reaguar sërish për situatën kaotike në Lungomare të Vlorës, ku hapësirat publike dhe trotuaret janë pushtuar nga tavolina e karrige të vendosura nga bizneset, duke bllokuar qarkullimin e lirë të qytetarëve.
Në një deklaratë për mediat, Rama theksoi se nuk është kundër modelit të shërbimit që shtrihet në një pjesë të trotuarit, siç ndodh në qytete të mëdha si Parisi, Londra apo New York-u, por paralajmëroi se Shqipëria nuk do të tolerojë “karikatura” të këtij modeli që i kthejnë trotuaret në pengesë për kalimtarët.
“Shërbimi në një pjesë të trotuarit është një standard ndërkombëtar, por kurrësesi nuk mund të tolerohet zaptimi total i hapësirës publike siç po ndodh në Lungomare. Nuk ka lidhje me zhvillimin ekonomik kur trotuari kthehet në territor privat,” deklaroi Rama.
Ai u bëri thirrje bizneseve që të bashkëpunojnë me Bashkinë e Vlorës dhe Agjencinë Kombëtare të Zhvillimit të Territorit për një dizajn të rregullt dhe të bashkërenduar të hapësirave të shërbimit, duke shtuar se shteti është i gatshëm t’i mbështesë në këtë proces.
Nesër pritet që Kryeministri të rikthehet në qytetin bregdetar për të ndjekur nga afër zbatimin e masave për lirimin e trotuareve dhe hapësirave të zëna në mënyrë të paligjshme.
Postimi i plotë i kryeministrit Edi Rama në platformën X:
Asnjë problem me karriget dhe shërbimin në një pjesë të trotuarit, si në Paris, Londër apo New York, por pa harruar që trotuari është i njerëzve dhe kurrësesi i barrikadave, si në Lungomare! Koha për të çliruar trotuaret nga barrikadat dhe për ta ngritur edhe shërbimin edhe dukjen në një nivel të ri, të denjë për Shqipërinë Turistike
Lungomarja është modeli i vijës ujore të një qyteti turistik bregdetar, tani duhet dhe do të jetë model i dizajnit të jashtëm të një vije shërbimesh
Prandaj pronarët e menaxherët e vijës së shërbimeve, duhet të heqin vetë tërë barrikadat dhe të bashkëpunojnë me bashkinë e Vlorës e me Agjencinë e Zhvillimit të Territorit për dizajnin e ri, për të cilin do t’i mbështesim me kënaqësi