Kryeministri Edi Rama ka njoftuar se të gjitha dëmet e shkaktuara nga zjarret do të kompensohen sipas një procedure të posaçme, që do të zbatohet në çdo bashki të prekur.
Procesi do të nisë me evidentimin e dëmeve nga Grupi i Konstatimit, i cili do të inventarizojë humbjet në banesa, infrastrukturë, biznese, kultura bujqësore, mjete mekanike dhe objekte social-kulturore, duke përgatitur formularët me kostot financiare.
Më pas, bashkitë do të përpilojnë listat e subjekteve të dëmtuara dhe dokumentacionin përkatës. Pas vlerësimit financiar, do të përcaktohet shuma për kompensim, e cila do të mbulohet nga fondet e bashkive përmes fondit të mbrojtjes civile.
Rama theksoi se rindërtimi i shtëpive të djegura do të kryhet plotësisht falas për familjet e prekura.