Kryeministri Edi Rama, në episodin e radhës të podcastit “Flasim”, e ka ndalur vëmendjen te Samiti i Diasporës, që do të mbahet në Tiranë më 13 prill.
Sipas kreut të qeverisë, ky është edicioni i katërt i një takimi që bashkon shqiptarët nga të gjitha anët e botës, ata që jetojnë dhe punojnë jashtë vendit, por që vijojnë ta mbajnë Shqipërinë në fokusin e tyre përmes kontributit, komunikimit dhe vizitave të vazhdueshme.
Rama theksoi se samiti do të nisë me ceremoninë e mirëseardhjes, ku në qendër do të jenë historitë e suksesit, punës dhe përkushtimit të shqiptarëve në diasporë, histori që sipas tij përfaqësojnë krenarinë shqiptare kudo në botë.
Ai nënvizoi se diaspora sot është kthyer në një forcë konkrete zhvillimi për vendin, sidomos pas përfshirjes së saj historike në zgjedhjet politike, duke u shndërruar gjithnjë e më shumë në një partner të drejtpërdrejtë për ekonominë, dijen dhe të ardhmen e Shqipërisë.
Sipas Ramës, sfida kryesore mbetet ndërtimi i një rrjeti të qëndrueshëm bashkëpunimi mes shqiptarëve brenda dhe jashtë vendit, në mënyrë që energjia, përvoja dhe kapitali njerëzor i diasporës të prodhojnë rezultate konkrete për zhvillimin e Shqipërisë.