Kryeministri Edi Rama, gjatë një takimi elektoral në Dibër, vlerësoi rolin e grave dhe vajzave dibrane në suksesin e Partisë Socialiste në këtë qark, duke deklaruar se pa angazhimin e tyre, fitorja është e pamundur.
“Kam ardhur këtu për të lëvizur ‘gurët e poshtëm’, që të ndryshojmë gjithë ‘gurët e epërm’. Më kujtohet takimi i parë i PS në Dibër, vetëm burra. Njëri hidhte fjalën, tjetri e priste. Nuk kuptoja asgjë. Vetëm një gjë më u bë e qartë: që budallai isha unë”, u shpreh Rama me ironi.
Ai shtoi se besimin tek gratë dibrane e ka ndarë gjithmonë me kryebashkiakun Astrit Ademi. “I thashë: nëse gratë nuk marrin komandën këtu, PS nuk fiton kurrë në Dibër. Dhe sot, kjo pamje që kemi përpara, nuk do të ishte imagjinueshme 10 vjet më parë. Kjo është pamja e fitores”, tha Rama.
Ai shprehu bindjen se falë grave dhe vajzave të Dibrës, më 11 maj qytetarët do të votojnë siç duhet, ndërsa më 12 maj “Dibra do gdhihet rozë”.
“Dibra, Shqipëria dhe Europa janë gra. Themeli më i fortë i PS-së janë gratë dhe vajzat”, përfundoi Rama.