Në çeljen e sezonit turistik në Himarë, kryeministri Edi Rama ka diskutuar për përparimet në çështjen e pronësisë dhe planet për zhvillimin e zonës, duke theksuar se puna do të vazhdojë edhe pas fushatës. Ai përmendi se janë bërë hapa përpara në zgjidhjen e titujve të pronësisë për shtëpitë e vjetra, por e pranoi se ka ende punë për të bërë në disa zona.
Rama tha se, së bashku me kryebashkiakun Vangjel Tavo dhe Mirelën, janë duke punuar për krijimin e një qendre moderne në Himarë, për parking të mëdhenj nëntokësor dhe për zhvillimin e zonave të tjera, përfshirë Borshin dhe Dhërmiun, ku priten përmirësime të mëdha.
Në një moment të fjalimit, Rama bëri batuta me Tavon, duke e quajtur “xhentëlmen” dhe “qejfli”. Ai e falënderoi për ndihmën në krijimin e guidës turistike dhe për buqetën me lule që Tavo i kishte dhuruar, duke thënë: “Je xhentëlmen, aq xhentëlmen sa edhe buqetën me lule e more si ata të Serenatave.”
Rama e mbylli fjalimin duke u shprehur optimist për sezonin turistik, duke thënë se sezoni do të jetë fantastik, pasi shumë projekte janë në proces dhe do të ndikojnë pozitivisht në zhvillimin e Himarës dhe zonave përreth.
“Pas mbylljes së fushatës, të fokusohemi te punët që duhet të vazhdojmë në këtë territor. Kemi mbyllur një pjesë të çështjes së pronësisë me shtëpitë e vjetra, por e di shumë mirë që puna vazhdon me pjesë të tjera që kanë të bëjnë me pronësinë.
Kemi folur me Vangjelin për qendrën e Himarës. Nuk e ka një qendër, ka një tmerr aty. Kemi folur për parkingun e madh nëntokësor te Stadiumi. Do të bëjmë një gjë spektakolare me parkingun. Kemi folur për Borshin, për zonat e tjera. Dhërmiu do të jetë komplet tjetër falë punës së Mirelës dhe Vangjelit, janë të dy gjirokastritë”, tha Rama.