Gjatë një takimi me deputetët socialistë të zgjedhur më 11 maj, Kryeministri Edi Rama denoncoi një rast të fundit që sipas tij tregon problemet e thella në sistemin gjyqësor.
Rama tha se shteti shqiptar ka humbur në Apel një proces gjyqësor për një aksident rrugor të ndodhur para 8 vitesh, ku nuk pati as viktima e as të plagosur, por tani duhet të paguajë 500 mijë euro dëmshpërblim.
“Shoferët paditën shtetin dhe sot gjykata vendosi kundër nesh, në kohë rekord, ndërsa shqiptarë të panumërt presin vendime në Apel prej vitesh,” tha Rama.
Kryeministri shtoi se edhe kur bëhet fjalë për shtetin, gabimet dhe abuzimet në sallat e gjyqeve nuk mund të korrigjohen. Megjithatë, ai theksoi se qeveria do të vijojë të mbështesë reformën në drejtësi dhe pavarësinë e institucioneve, veçanërisht SPAK-un.