Ministria e Bujqësisë dhe Zhvillimit Rural ka vendosur të kompensojë financiarisht fermerët e prekur nga përhapja e murtajës së bagëtive, e cila një vit më parë shkaktoi dëme të konsiderueshme në blegtori.
Sipas autoriteteve, forma e dëmshpërblimit nuk do të jetë me zëvendësim të kafshëve, por përmes pagesave financiare për fermerët e dëmtuar. Sëmundja e Murtaja e ruminantëve të vegjël u përhap me shpejtësi në 11 qarqe të vendit, duke çuar në asgjësimin e rreth 2000 krerëve dele dhe dhi.
Agjencia Kombëtare e Veterinarisë dhe Mbrojtjes së Bimëve ka përgatitur listën e plotë të fermerëve përfitues, ku përfshihen emrat, qarqet përkatëse dhe vlera e kompensimit që do të përfitojnë.
Drejtori i përgjithshëm i AKVMB-së, Roland Meçaj, bëri me dije se, edhe pse situata ishte stabilizuar, më 30 mars është shfaqur një vatër e re në Dibër, ku u asgjësuan rreth 220 krerë bagëti. Sipas tij, rasti është izoluar dhe janë marrë të gjitha masat për të parandaluar përhapjen e mëtejshme.
Autoritetet theksojnë se kjo sëmundje prek vetëm bagëtinë e imët dhe nuk transmetohet te njerëzit. Megjithatë, produktet me origjinë shtazore nga kafshët e infektuara nuk duhet të përdoren për konsum, për të garantuar sigurinë ushqimore.
Ky vendim synon të lehtësojë barrën financiare të fermerëve dhe të mbështesë rimëkëmbjen e sektorit blegtoral pas dëmeve të shkaktuara nga epidemia.