Presidenti rus Vladimir Putin është larguar me nxitim nga një seancë plenare e forumit “Strong Ideas for a New Time”, për t’iu përgjigjur një telefonate nga presidenti amerikan Donald Trump. Momenti është bërë viral në rrjete sociale, pasi Putin kërkoi falje para publikut dhe theksoi se nuk donte ta linte Trumpin të priste.
“Ju lutem, mos u zemëroni. E kuptoj që mund të flasim më gjatë, por është e sikletshme ta bësh Trumpin të presë — ai mund të ofendohet,” tha Putin përpara se të largohej nga ngjarja, e organizuar nga Agjencia për Iniciativa Strategjike.
Biseda telefonike e zhvilluar të enjten është e gjashta e njohur publikisht mes dy liderëve që nga kthimi i Trumpit në detyrë. Trump, nga ana e tij, e kishte paralajmëruar telefonatën në një postim në rrjetin e tij social Truth Social, por më pas deklaroi se ishte “i zhgënjyer” nga përmbajtja e saj — pa dhënë më shumë detaje.
Zhvillimi i kësaj telefonate vjen në një moment të ngarkuar për marrëdhëniet ndërkombëtare, ndërsa komuniteti global ndjek me vëmendje kontaktet mes Uashingtonit dhe Moskës.