Presidenti ukrainas Volodymyr Zelensky deklaroi se Ukraina nuk do të lejojë që Rusia të mashtrojë Shtetet e Bashkuara, ndërsa po afrohet takimi i shumëpritur mes presidentit amerikan Donald Trump dhe atij rus Vladimir Putin.
“Ekipi ynë është në komunikim të vazhdueshëm me SHBA-në për të siguruar paqen e vërtetë. E kuptojmë përpjekjen e Rusisë për të manipuluar Amerikën, por nuk do ta lejojmë këtë. Vlerësoj vendosmërinë e presidentit Trump për të dhënë fund kësaj lufte,” tha Zelensky.
Trump njoftoi javën e kaluar se do të takohet me Putin më 15 gusht 2025 në Alaskë për bisedime rreth përfundimit të konfliktit në Ukrainë.
“Takimi i shumëpritur midis meje dhe presidentit Putin do të mbahet të premten e ardhshme në Alaskë. Detajet e mëtejshme do t’i bëj me dije,” tha Trump.
Zelensky theksoi se çdo ditë humbin jetë shumë njerëz dhe fajësoi Putinin për fillimin dhe vazhdimin e luftës, duke theksuar se ukrainasit kanë duruar më shumë se tre vjet një luftë të shkallës së plotë.
“Ne do ta mbrojmë sovranitetin dhe pavarësinë tonë dhe falënderojmë të gjithë ata që na mbështesin,” përfundoi ai.