Paris Saint-Germain ka realizuar një fitore historike në finalen e Ligës së Kampioneve, duke shkatërruar Interin me rezultatin 5-0 në “Allianz Arena” të Mynihut dhe duke ngritur për herë të parë trofeun më të madh europian për klube.
Skuadra e Luis Enrique dominoi pa mëshirë që nga minuta e parë, duke goditur fillimisht me Hakimin (12′) dhe Doue (20′), ndërsa më pas mori kontrollin e plotë të ndeshjes. Me një lojë të rrjedhshme dhe agresive, francezët goditën sërish në pjesën e dytë, me Doue që kompletoi dopietën në minutën e 63-të, Kvaratskhelia që realizoi në të 73-ën, dhe më pas një tjetër adoleshent, Majulu, që vulosi rezultatin në minutën e 85-të.
Fitorja 5-0 jo vetëm që i kurorëzon kampionë të Evropës për herë të parë në histori, por vjen me një performancë të frikshme nga një ekip i ndërtuar rreth emrave të rinj dhe të talentuar, të cilët shfaqën cilësi të jashtëzakonshme në një skenë madhështore.
PSG-INTER 5-0
⚽ 12′ Hakimi
⚽ 20′, 63′ Doue
⚽ 73′ Kvaratskhelia
⚽ 85′ Majulu
Një natë që do të mbahet mend gjatë nga tifozët parizienë dhe një sinjal i fortë për dominimin e ardhshëm në futbollin europian.