Drejtori i Përgjithshëm i Policisë së Shtetit, Ilir Proda, uroi shqiptarët me rastin e Festave të Nëntorit, duke theksuar rëndësinë historike të këtij muaji dhe rolin e Policisë së Shtetit në shërbim të qytetarëve.
“Nëntori është muaji i flamurit tonë, i grave dhe burrave që sakrifikuan për liri dhe i vlerave që na mbajnë si komb. Në këto ditë të shënuara, nderojmë ata që dhanë gjithçka për pavarësinë, lirinë dhe mbrojtjen e atdheut,” shkruan Proda.
Ai nënvizoi se Policia e Shtetit ka një vend të veçantë në historinë e vendit, duke kujtuar dëshmorët që ranë në krye të detyrës për të mbrojtur jetën, qetësinë dhe të ardhmen e qytetarëve. “Ata janë pjesë e kujtesës dhe identitetit tonë profesional dhe njerëzor, në piedestalin e nderit dhe historisë,” shtoi drejtori i Policisë.
Proda theksoi gjithashtu se sot Policia është më e hapur dhe më pranë komunitetit se kurrë më parë, duke punuar mbi bashkëpunimin, besimin dhe idenë se siguria është një vlerë e përbashkët. Ai siguroi se përmes përvojës dhe besimit të qytetarëve, Policia e Shtetit është e vendosur të krijojë një mjedis më të sigurt për të gjithë.
“Me respekt dhe mirënjohje për qytetarët që na besojnë dhe bashkëpunojnë me ne, në emër të Policisë së Shtetit ju uroj Gëzuar Festat e Nëntorit! Me krenari kombëtare, dinjitet dhe dashuri për atdheun, nderojmë të gjithë ata që kanë sakrifikuar dhe vazhdojnë të sakrifikojnë për Shqipërinë,” përfundon Proda.