Vetëm disa orë pas arrestimit të tij në kuadër të hetimeve për dosjen “Epstein”, Princi Andrew është liruar nga policia britanike. Autoritetet konfirmuan në një njoftim zyrtar se ish-Duka i Jorkut mbetet nën hetim për dyshimin për shpërdorim detyre në detyrën publike, por nuk do të mbahet në paraburgim.
Andrew, vëllai i King Charles III, u arrestua në ditën e 66-vjetorit të tij. Ai është një nga anëtarët më të lartë të familjes mbretërore britanike që përballet me një procedurë të tillë në historinë moderne. Pas përfundimit të procedurave, ai u fotografua duke dalë nga stacioni i policisë.
Policia bëri të ditur se kontrollet në Norfolk janë përfunduar, ndërsa hetimet dhe kërkimet në Berkshire vazhdojnë. Arrestimi i tij lidhet me disa email-e të publikuara nga Departamenti i Drejtësisë i SHBA, të cilat sugjerojnë se Andrew kishte shpërndarë raporte nga vizita zyrtare në Azi, përfshirë Hong Kong, Vietnam dhe Singapor.
Mes të dhënave të dyshuara është një email i nëntorit 2010, i dërguar pak minuta pas marrjes së tij nga këshilltari i Andrew, si dhe një tjetër mesazh pranë Krishtlindjes të po atij viti, i cili i ishte dërguar financiarit të dënuar Jeffrey Epstein dhe përfshinte dokumente konfidenciale mbi mundësitë e investimit në rindërtimin e provincës Helmand në Afganistan.