Princesha Anne, vajza e vetme e Mbretëreshës Elizabeth II dhe motra e Mbretit Charles III, feston sot ditëlindjen e saj të 75-të, duke shënuar një jetë të përkushtuar ndaj detyrave mbretërore dhe bamirësisë.
E njohur si “princesha punëtore”, Anne vazhdon të jetë një nga anëtaret më aktive të familjes mbretërore britanike, me 474 angazhime zyrtare të planifikuara vetëm për vitin 2025 – më shumë se çdo anëtar tjetër i familjes Windsor, përfshirë edhe mbretin Charles.
Megjithë një incident të rëndë në qershor, kur u rrëzua nga kali dhe u shtrua në spital me tronditje, princesha është rikthyer shpejt tek aktivitetet e saj. Ditëlindjen e ka festuar me një ditë pushimi të rrallë, duke lundruar me bashkëshortin, Zëvendës Admiralin Tim Laurence.
Për nder të përvjetorit, Royal Mint ka prodhuar monedha përkujtimore prej 5 paundësh në argjend dhe ar me portretin e saj – një nder që më parë ishte rezervuar vetëm për sovranët britanikë. Ndërkohë, Buckingham Palace publikoi një portret të ri zyrtar ku Anne shfaqet e veshur me një fustan blu mbretëror.
Princesha Anne është përkushtuar për dekada ndaj mbi 100 organizatave bamirëse. “Mbështetja e saj diskrete është frymëzim për ne,” tha Moazzam Malik, drejtori ekzekutiv i Save the Children UK, organizatë me të cilën Anne ka bashkëpunuar gjatë gjithë karrierës së saj.
E lindur më 15 gusht 1950, Anne u bë e para anëtare e familjes mbretërore që konkurroi në Lojërat Olimpike, në Montreal më 1976. Pasioni për sportet, sidomos hipizmin, e ka mbajtur aktive fizikisht edhe në moshë të avancuar.
Ndër momentet më dramatike të jetës së saj ishte tentativë e rrëmbimit pranë Pallatit Buckingham në 1974. Kur një person i armatosur e urdhëroi të dilte nga makina, Anne reagoi me ftohtësi: “Nuk ka gjasa.” Ky moment u bë simbol i vendosmërisë dhe qetësisë së saj.
Sipas sondazheve të YouGov, Anne renditet e treta më e pëlqyera në familjen mbretërore, pas Princit William dhe Princeshës Kate, me një mbështetje prej 70%.
Qëndrueshmëria, diskrecioni dhe përkushtimi i palodhur e kanë bërë Princeshën Anne një nga figurat më të respektuara të familjes mbretërore, duke i fituar me meritë reputacionin e “princeshës punëtore”.
