Presidenti amerikan Donald Trump ka deklaruar se një raund i ri bisedimesh me Iranin mund të zhvillohet brenda 48 orëve të ardhshme, duke lënë të hapur mundësinë për një përparim të shpejtë diplomatik.
Në një intervistë telefonike për “The New York Post”, Trump u shpreh se negociatat “po ecin përpara, por me një ritëm disi të ngadaltë”, duke sinjalizuar se diskutimet janë ende në zhvillim.
Fillimisht ai la të kuptohej se takimi mund të organizohej në Europë, por më pas përmendi edhe kryeqytetin e Pakistanit, Islamabadin, si një opsion të mundshëm për zhvillimin e bisedimeve, duke shtuar se “diçka mund të ndodhë në dy ditët e ardhshme”.
Trump vlerësoi gjithashtu kreun e forcave të armatosura pakistaneze, Asim Munir, të cilin e cilësoi si “fantastik” dhe një figurë kyçe në lehtësimin e mundshëm të procesit diplomatik.
Në të njëjtën kohë, ai kritikoi raportimet se SHBA ka propozuar një ngrirje 20-vjeçare të programit iranian të pasurimit të uraniumit, duke theksuar se qëndrimi i tij mbetet i pandryshuar: “Unë vazhdoj të them se ata nuk mund të kenë armë bërthamore”.
Deklaratat e Trump vijnë në një moment tensionesh të larta në marrëdhëniet SHBA–Iran, ndërsa mbetet për t’u parë nëse një raund i ri bisedimesh do të konkretizohet në ditët në vijim.