Policia Kufitare dhe Njësia Policore Detare kanë shtuar ndjeshëm monitorimet dhe kontrollet në ujërat shqiptare, nga Komani në Ksamil – për të garantuar sigurinë e pushuesve dhe për të parandaluar shkeljet e rregullave të lundrimit.
Gjatë javës së fundit janë kontrolluar 215 mjete lundruese, prej të cilave 15 janë bllokuar për shkelje të ndryshme. Konkretisht, policia ka ndaluar:
8 jet ski
3 skafe
3 gomone
1 varkë metalike me motor uji të instaluar
Nga këto, 6 mjete u konstatuan duke lundruar brenda perimetrit të sigurisë, duke rrezikuar jetën e pushuesve. Drejtuesit e tyre u gjobitën me 100 mijë lekë secili.
Në të njëjtën periudhë, falë ndërhyrjeve të shpejta të policisë, janë shpëtuar 39 qytetarë shqiptarë e të huaj, si dhe 18 mjete lundruese që kishin mbetur në vështirësi, kryesisht për shkak të motit të keq.
Policia Kufitare apelon për respektimin e rregullave të qarkullimit detar dhe fton qytetarët të raportojnë çdo shkelje në numrin pa pagesë 112, duke garantuar reagim të menjëhershëm dhe masa ndaj shkelësve.
