Policia e Greqisë ka vënë në pranga katër persona të dyshuar për përfshirje në vrasjen e Jorgos Moskouris, i njohur si “Thamnakia”, një figurë e dyshuar e krimit të organizuar në Greqi, i ekzekutuar në prill 2025 në zonën e Halandrit.
Sipas autoriteteve greke, arrestimet u kryen më 6 maj pas një hetimi disa mujor nga njësia e vrasjeve. Të dyshuarit akuzohen se kanë qenë pjesë e grupit mbështetës që ka ndihmuar ekzekutorët e atentatit, duke siguruar armë, automjete dhe logjistikë për realizimin dhe largimin e autorëve nga vendngjarja.
Në pranga kanë rënë dy shtetas grekë me origjinë shqiptare dhe dy shtetas grekë, të cilët dyshohet se kanë luajtur rol në organizimin dhe mbështetjen operative të krimit.
Hetimet tregojnë se vrasja e 55-vjeçarit lidhet me përplasje në botën e krimit për kontrollin e kontrabandës së duhanit. Autoritetet po hetojnë gjithashtu lidhje të mundshme me rrjete të krimit të organizuar ndërkombëtar, përfshirë një figurë të njohur me nofkën “Entik”, që dyshohet se ndodhet në Dubai.
Edhe pse janë bërë disa arrestime, autorët e drejtpërdrejtë të ekzekutimit mbeten ende në arrati. Hetuesit dyshojnë se vrasja është kryer nga profesionistë të huaj, të cilët janë larguar menjëherë pas atentatit.
Ngjarja e 24 prillit 2025 ndodhi jashtë një klinike private në Halandri, ku Moskouris u qëllua me armë automatike dhe humbi jetën në vend. Automjeti i përdorur nga autorët u gjet më vonë i djegur në një zonë të afërt.