Policia e Gjirokastrës finalizoi gjatë 24 orëve të fundit dy operacione të koduara “Attempt 3” dhe “The Bridge 1”, kundër dhënies së ndihmës për emigrantët nga vendet e treta me qëllim kalimin e paligjshëm të kufirit.
Si rezultat i këtyre operacioneve, u arrestuan tre shtetas që transportonin drejt Shkodrës dhe Malit të Zi gjithsej 20 emigrantë. Po ashtu, u sekuestruan tre automjete dhe celularët e të arrestuarve.
Në kuadër të operacionit “Attempt 3”, Seksioni për Hetimin e Trafiqeve të Paligjshme, në bashkëpunim me Policinë Rrugore, Forcën e Posaçme “Shqiponja” dhe Sektorin Operacional, arrestuan shtetasin A. Rr., 28 vjeç, banues në Shkodër, i cili u kap në vendin e quajtur “Kthesa e Andon Poçit”, duke transportuar 10 emigrantë.
Ndërsa në kuadër të operacionit “The Bridge 1”, Seksioni për Hetimin e Krimeve në DVKM Gjirokastër, në bashkëpunim me Stacionin e Policisë së Kufirit të Gjelbër Kakavije, arrestuan shtetasit R. Sh., 45 vjeç dhe F. S., 37 vjeç, banues në Tiranë. R. Sh. u kap në vendin e quajtur “Ura e Glinës”, duke transportuar 10 emigrantë, ndërsa 37-vjeçari sinjalizonte rrugën për të paralajmëruar bashkëpunëtorin për praninë e policisë.
Materialet procedurale iu referuan Prokurorisë së Gjirokastrës për veprime të mëtejshme.
Policia rikujton qytetarët që të mos ndihmojnë në kalime të paligjshme dhe i fton të denoncojnë çdo aktivitet të tillë në numrin 112, duke garantuar anonimatin dhe reagim të shpejtë.
Radar.al