Presidenti amerikan Donald Trump ka ashpërsuar retorikën ndaj presidentit rus Vladimir Putin, duke e akuzuar për “marrëzira” në lidhje me luftën në Ukrainë dhe duke paralajmëruar masa të reja ndëshkuese ndaj Moskës.
“Putini po thotë shumë marrëzira,” deklaroi Trump gjatë një mbledhjeje me kabinetin në Shtëpinë e Bardhë. “Nuk jam aspak i kënaqur me qëndrimin e tij,” shtoi presidenti amerikan, duke bërë të ditur se administrata po shqyrton sanksione të reja për të ndëshkuar agresionin e vazhdueshëm rus.
Ai njoftoi gjithashtu se SHBA do të rrisë prodhimin e armëve, duke shtuar: “Do të forcojmë kontraktorët tanë që të punojnë më shpejt.” Trump bëri të ditur se është në bisedime me qeveri të huaja për të shtuar mbështetjen ushtarake, duke veçuar Korenë e Jugut, për të cilën theksoi se “duhet të paguajë më shumë për mbrojtjen e saj”.
Presidenti Trump njoftoi gjithashtu se tarifat e reja ndaj eksporteve europiane do të hyjnë në fuqi më 1 gusht. “Janë tarifa të ulëta dhe të drejta,” tha ai, duke shtuar se një letër zyrtare për Bashkimin Europian do t’u dërgohet brenda dy ditësh, për të specifikuar nivelin e tarifave.
Ai vlerësoi se “BE po tregohet më e sjellshme” në raundet e fundit të negociatave tregtare me SHBA-në.
Në fund të mbledhjes, Trump rinovoi kritikat ndaj politikës monetare të Rezervës Federale, duke kërkuar dorëheqjen e menjëhershme të guvernatorit Jerome Powell. Presidenti akuzoi Fed-in për frenim të rritjes ekonomike dhe ndikim negativ mbi tregjet financiare.