Shqiptari që u ekzekutua ditën e sotme në zonën bregdetare të Rafinës, në Athinë, është identifikuar si Altin Arapaj, 41 vjeç, një emër i njohur për autoritetet greke, pasi kishte precedentë penalë, përfshirë edhe për trafik droge.
Ai u qëllua me armë zjarri në një vresht, ku plumbi e goditi drejtpërdrejt në faqe, duke i shkaktuar vdekjen. Sipas burimeve të mediave greke, pak çaste para se të ndërronte jetë, Arapaj ka arritur të telefonojë gruan e tij, të cilës dyshohet se i ka treguar emrin e autorit, duke thënë: “Më ka qëlluar një mik.”
Autoritetet greke kanë nisur menjëherë hetimet, duke rrethuar zonën e ngjarjes dhe duke analizuar të gjitha pistat, përfshirë edhe prapavijat e mundshme të lidhura me aktivitetin kriminal të viktimës.
Burime pranë hetimit thonë se gruaja e viktimës mund të jetë çelësi për identifikimin e autorit, pasi dyshohet se ajo e njeh personin që qëlloi bashkëshortin e saj.