Një studim i fundit shkencor ka ngritur shqetësime serioze mbi sigurinë e gotave njëpërdorimshe prej kartoni që përdoren gjerësisht për çaj dhe kafe. Hulumtimi është realizuar nga Instituti Indian i Teknologjisë (IIT) në Kharagpur dhe tregon se këto gota mund të çlirojnë mikroplastika kur vijnë në kontakt me pije të nxehta.
Sipas ekipit kërkimor të udhëhequr nga Prof. Sudha Goel, gotat e kartonit janë të veshura me një shtresë të hollë plastike, kryesisht polietilen, e cila shërben për të parandaluar rrjedhjen e lëngut. Kur në to derdhen pije me temperaturë 85–90°C, kjo shtresë fillon të degradohet.
Rezultatet tregojnë se brenda vetëm 15 minutash, 100 ml pije e nxehtë mund të përmbajë rreth 25 mijë grimca mikroplastike. Konsumimi i disa gotave në ditë mund të çojë në një ekspozim të konsiderueshëm ditor ndaj këtyre grimcave të padukshme.
Hulumtimi u krye përmes analizave laboratorike, ku u vëzhguan ndryshime të dukshme fizike dhe kimike në shtresën plastike të gotave pas kontaktit me ujë të nxehtë. Studiuesit konstatuan gjithashtu praninë e joneve dhe përbërjeve të tjera që kalojnë në pije.
Ekspertët paralajmërojnë se mikroplastikat mund të veprojnë si bartëse të substancave toksike, përfshirë metale të rënda dhe përbërje që ndikojnë në sistemin hormonal. Studime ndërkombëtare sugjerojnë se ekspozimi afatgjatë mund të lidhet me inflamacion, stres oksidativ dhe çrregullime shëndetësore, edhe pse kërkohen më shumë prova te njerëzit.
Për të ulur rrezikun, specialistët rekomandojnë shmangien e pijeve të nxehta në gota kartoni njëpërdorimshe dhe përdorimin e enëve prej qelqi, porcelani ose çeliku inox. Ky veprim, sipas tyre, ndihmon si në mbrojtjen e shëndetit, ashtu edhe në reduktimin e ndotjes mjedisore.