Zeqir Kordhoni, kandidat i renditur i nënti në listën e koalicionit “Nisma Shqipëria Bëhet” në qarkun e Tiranës, ka paraqitur një kërkesë zyrtare në Komisionin Qendror të Zgjedhjeve, ku shpreh qartë synimin për të ushtruar mandatin e deputetit, në rast se i takon sipas shpërndarjes së mandateve.
Në shkresën drejtuar KQZ-së, Kordhoni kërkon që çdo deklaratë tjetër e depozituar më parë në emrin e tij, nga vetë ai apo nga koalicioni, të mos merret parasysh. “Kërkoj që KQZ të injorojë çdo deklaratë tjetër të depozituar më parë nga Koalicioni ‘Nisma Shqipëria Bëhet’ ose në emrin tim dhe të marrë në konsideratë vetëm këtë deklaratë si shprehje të qartë dhe të vlefshme të vullnetit tim”, thuhet në dokument.
Ky zhvillim i fundit përbën një sfidë për kreun e koalicionit, Adriatik Lapaj, i cili synon të marrë vetë mandatin. Nëse Kordhoni nuk tërhiqet, ai përfiton automatikisht vendin në Kuvend, sipas renditjes zyrtare në listën e mbyllur.
Më herët, Kordhoni kishte deklaruar publikisht se “nuk mban mend” çfarë dokumenti kishte firmosur lidhur me tërheqjen nga mandati, dhe kishte kërkuar nga kreu i KQZ-së, Ilirjan Celibashi, që t’i jepte informacion mbi dokumentacionin e dorëzuar nga partia e Lapajt në emër të tij.
Kordhoni është një emër i panjohur për publikun, dhe në CV-në e tij ka deklaruar se ka qenë punëtor ndërtimi, aktualisht përfitues i KEMP. Ky ngërç ligjor i hap rrugën një përballjeje të re për interpretimin e rregullave për dorëheqjen nga mandati në kuadër të një liste të mbyllur zgjedhore.