Shira të rrëmbyeshëm shkaktuan përmbytje masive gjatë natës në zonën metropolitane të Nju Jorkut dhe shtetin e Nju Xhersit, duke sjellë ndërprerje të transportit dhe operacione të shumta emergjente.
Sipas autoriteteve meteorologjike amerikane, sasia e reshjeve ishte e pazakontë: në Nju Jork ranë deri në 45 mm shi në më pak se dy orë, ndërsa në disa pjesë të Nju Xhersit akumulimi arriti deri në 150 mm. Kjo mbingarkoi sistemin e kanalizimeve dhe shkaktoi përmbytje të menjëhershme në zona urbane me popullsi të dendur.
Guvernatori i Nju Xhersit, Phil Murphy, shpalli gjendje të jashtëzakonshme në disa qarqe, duke paralajmëruar për kushte të rrezikshme udhëtimi dhe duke këshilluar qytetarët të qëndrojnë në banesat e tyre. Situata më kritike u raportua në zona të dendura si qyteti i Nju Jorkut, ku disa stacione të metrosë u përmbytën dhe linjat u ndërprenë, veçanërisht në Chelsea dhe Manhattanin e poshtëm.
Fluturimet në aeroportet kryesore të rajonit — JFK, LaGuardia dhe Newark Liberty — u pezulluan përkohësisht, ndërsa shumë rrugë të rëndësishme mbetën të bllokuara për shkak të trafikut dhe prurjeve të ujit.
Në Nju Xhersi, ekipet e emergjencës ndërhynë në dhjetëra raste për të shpëtuar persona të bllokuar në automjete apo të izoluar nga përmbytjet. Paralajmërimet për rrezik përmbytjesh mbetën aktive për pjesën veriore të shtetit deri në mëngjesin e sotëm, sipas Shërbimit Kombëtar të Motit (NWS).
Gjendja e motit ekstrem preku gjithashtu shtetet e Virxhinias, Merilendit dhe Pensilvanisë, ku vazhdon të jetë në fuqi një paralajmërim për përmbytje të menjëhershme. Deri tani, nuk raportohet për viktima.
Ndërsa reshjet më të dendura janë zhvendosur drejt lindjes, shumë rrugë mbeten të pakalueshme dhe shërbimet e transportit publik po punojnë për rikthimin e funksionimit të plotë. Kjo ngjarje ka ringjallur debatin mbi infrastrukturën urbane dhe nevojën për përshtatje ndaj ndryshimeve klimatike.
Kandidati demokrat për kryetar bashkie të Nju Jorkut, Zohran Mamdani, theksoi në një postim në platformën “X” se qyteti ka nevojë për modernizim të infrastrukturës për të përballuar “realitetin e ri klimatik” që po përjeton gjithnjë e më shpesh.