Momente tensioni janë regjistruar në Como, disa orë para nisjes së ndeshjes mes ekipit të drejtuar nga Fabregas dhe Bologna-s. Përleshjet ndodhën pranë stadiumit Sinigaglia, ku dy grupe tifozësh u përfshinë në incidente.
Sipas raportimeve, dy autobusë me tifozë të Bologna-s, të mbërritur në zonë, kaluan pranë një bari të frekuentuar nga tifozët vendas të Comos. Fillimisht pati shkëmbim fjalësh dhe fyerjesh, ndërsa situata u përshkallëzua shpejt me hedhje shishesh mes palëve.
Ndërhyrja e menjëhershme e forcave të rendit shmangu përshkallëzimin e mëtejshëm të situatës dhe riktheu qetësinë brenda pak minutash. Si masë sigurie, policia mbylli përkohësisht disa rrugë në zonë dhe shoqëroi autobusët me tifozë të Bologna-s larg stadiumit.