Shqipëria vazhdon të përballet me flakë të mëdha për shkak të temperaturave të larta dhe erërave që favorizojnë përhapjen e zjarreve, veçanërisht në zonat jugore. Në Syrin e Kaltër, situata është përkeqësuar aq shumë sa vizitorët janë evakuuar për shkak të rrezikut.
Zjarri në këtë zonë po përhapet me shpejtësi dhe për të ndihmuar në fikjen e tij po përdoret një helikopter, ndërsa në ditët në vijim pritet të mbërrijnë edhe dy avionë nga Greqia.
Një vatër tjetër zjarri është aktiv midis fshatrave Janjar dhe Ninat në Konispol, ku flakët rrezikojnë një stan me 350 bagëti dhe sipërfaqe të mbjella me ullishte dhe arra.
Situata mbetet kritike edhe në Finiq, ku zjarri ka përfshirë prej ditësh disa fshatra duke dëmtuar edhe banesa në Leshnicë e Poshtme dhe duke u përhapur drejt Kranës në njësinë administrative Mesopotam.
Në terren po punojnë 37 zjarrfikës me 6 automjete, 20 forca policore, 30 punonjës bashkiakë dhe vullnetarë, të mbështetur nga Forcat e Armatosura me 28 efektivë, 4 automjete zjarrfikëse, një autoambulancë dhe një autobot, ndërsa nga ajri ndërhyn avioni Canadair nga Kroacia për të shuar flakët.