Zjarri që shpërtheu dy ditë më parë në fshatin Malaj të Mirditës vijon të mbetet aktiv, duke djegur dhjetëra hektarë pyje me pisha. Përpjekjet për shuarjen e flakëve janë intensifikuar, me 30 forca ushtarake të angazhuara në terren, të cilat po fokusohen kryesisht në mbrojtjen e banesave në zonat e rrezikuara.
Terreni i thyer malor ka penguar ndjeshëm ndërhyrjen nga toka, duke detyruar Mbrojtjen Civile të kërkojë ndihmë nga ajri. Mesditën e së shtunës, një avion tip Canadair nga Kroacia kreu 11 rrugë mbi zonën, duke arritur ta vendosë nën kontroll vatrën kryesore.
Edhe pse rreziku i menjëhershëm për banesat është shmangur, zjarrfikësit dhe emergjencat civile vijojnë kontrollin e perimetrit për të parandaluar çdo rindezje të mundshme të flakëve.
Shkaqet e zjarrit, i cili u shfaq mesditën e së enjtes, mbeten ende të paqarta. Kjo është e vetmja vatër aktive në qarkun e Lezhës, por përmasat e saj kanë vënë në provë si forcat vendore, ashtu edhe ato ndërkombëtare.
Radar.al