Pas konfirmimit të një rasti me lijën e majmunit në Shqipëri, mjekja Aurora Dollenberg, nga Gjermania, ka ngritur alarmin për rrezikun e përhapjes së shpejtë të këtij virusi, veçanërisht te fëmijët dhe të moshuarit.
E ftuar në emisionin “People”, Dollenberg sqaroi se kjo sëmundje njihet në gjuhën popullore si lija e dhisë apo e dhenve, dhe përhapet me ritme shumë të shpejta.
“Në moshën fëmijënore, virusi përhapet në kohë rekord – brenda 6 minutash nga momenti i kontaktit me lëkurën, pështymën ose sipërfaqe të kontaminuara”, theksoi ajo.
Sipas mjekes, virusi mbijeton në sipërfaqe të padisinfektuara, duke e kthyer ambientin përreth në burim potencial infeksioni.
“Mjafton që mobiljet apo lodrat të jenë prekur nga një fëmijë i sëmurë dhe të mos jenë dezinfektuar – rreziku është real dhe i menjëhershëm”, paralajmëroi Dollenberg.
Ajo shtoi se për momentin nuk ka terapi specifike ndaj virusit, ndërsa faza më e rrezikshme për infektim është ajo kur shfaqen flluskat me lëng në trup.
“Ato janë shumë ngjitëse dhe virusi mund të transmetohet në mbi 90% të kontakteve të afërta. Vetëm kur flluskat thahen dhe shfaqet korja tipike, rreziku i infektimit fillon të ulet”, shtoi ajo.
Çfarë është lija e majmunit?
Lija e majmunit është një sëmundje virale zoonotike (që transmetohet nga kafshët te njerëzit), e cila shkakton ethe, dhimbje trupi, ënjtje të nyjeve limfatike, si dhe një skuqje e lëkurës që kalon në flluska me lëng dhe më pas në kore. Në shumicën e rasteve, ajo është e lehtë dhe kalon brenda pak javësh, por kërkon kujdes të shtuar higjieno-sanitar, veçanërisht në mjediset ku ka fëmijë ose persona me imunitet të dobët.