Ministri izraelit i Mbrojtjes, Israel Katz, ka thirrur sot në zyrë shefin e shtabit të forcave të armatosura, gjeneralin Eyal Zamir, mes tensioneve në rritje midis ushtrisë dhe qeverisë përpara nisjes së një operacioni të ri ushtarak në Rripin e Gazës.
Sipas Ministrisë së Mbrojtjes, konsultimet e zhvilluara nga gjenerali Zamir mbi emërimet në hierarkinë ushtarake janë bërë “pa koordinim ose marrëveshje paraprake” me ministrin, i cili theksoi se “nuk ka ndërmend t’i diskutojë apo miratojë” ato.
Në reagim, gjenerali Zamir deklaroi se është “i vetmi autoritet i autorizuar për të emëruar oficerë nga grada e kolonelit” dhe se emërimet i paraqiten ministrit vetëm për miratim formal.
Përplasja ndodh në një kohë kur marrëdhëniet midis shefit të shtabit dhe qeverisë së kryeministrit Benjamin Netanyahu janë tensionuar, veçanërisht për strategjinë ushtarake në Gaza. Mediat izraelite raportojnë se Zamir kundërshton planin e miratuar së fundmi për marrjen e kontrollit të Qytetit të Gazës, zona e vetme me popullsi të dendur që nuk është nën kontrollin e ushtrisë izraelite, e cila aktualisht mban nën kontroll rreth 75% të enklavës pas 22 muajsh lufte.
Gjenerali Zamir, i emëruar në detyrë në mars, ka deklaruar se do të vazhdojë të flasë “pa frikë” dhe në mënyrë “profesionale”, ndërsa Katz i është kundërpërgjigjur se shefi i shtabit duhet të “zbatojë me vendosmëri” vendimet politike të qeverisë.