Një ngjarje e frikshme u regjistrua mëngjesin e së mërkurës në Terminalin 1 të Aeroportit të Malpensës, ku një burrë hodhi lëng të ndezshëm në sportelin 13 të “Check-in”, duke shkaktuar zjarr dhe panik mes udhëtarëve.
Forcat e rendit dhe personeli i sigurisë ndërhynë me shpejtësi, duke arrestuar autorin dhe duke parandaluar përshkallëzimin e mëtejshëm të situatës.
Fillimisht u raportuan zëra që mund të ngatërroheshin me të shtëna, por më pas u konstatua se individi kishte përdorur një çekiç për të dëmtuar strukturën, ndërsa spërkati sportelin me lëng të ndezshëm.
Autori, një burrë me origjinë në Mali, por rezident në Itali, nuk rezultoi me precedent të mëparshëm penal. Ai akuzohet për dëmtime të rënda, ndërsa fatmirësisht nuk pati të lënduar.
Zjarrfikësit shuan flakët në pak minuta dhe terminali u evakuua për arsye sigurie. Pavarësisht tensionit, trafiku ajror vijoi normalisht dhe operacionet e aeroportit nuk pësuan ndërprerje të mëdha.
https://twitter.com/i/status/1958116686575665415