Administrata Tatimore ka nisur një fushatë informuese dhe ndërgjegjësuese që synon tregtarët e produkteve bujqësore dhe blegtorale, me synimin për të garantuar formalizimin e aktivitetit të tyre, për të rritur sigurinë ushqimore dhe për të mbrojtur konsumatorët.
Gjatë dy javëve të para, kjo nismë do të fokusohet në sensibilizimin e tatimpaguesve, ndërsa më pas do të pasojë faza e inspektimeve në terren nga një Task-Forcë e dedikuar, e përbërë nga inspektorë të Hetimit Tatimor dhe të monitorimit. Kontrolli do të fokusohet tek zbatimi i detyrimit për shoqërimin e çdo produkti me faturë tatimore të fiskalizuar.
Sipas Ligjit Nr. 87/2019 “Për faturën dhe sistemin e monitorimit të qarkullimit”, çdo tatimpagues që tregton produkte bujqësore ose blegtorale është i detyruar:
-
Të ketë për çdo produkt që disponon një faturë të fiskalizuar të blerjes, ku të identifikohet qartë shitësi dhe origjina e produktit;
-
Të lëshojë faturë të fiskalizuar për çdo shitje ndaj konsumatorit final, me emërtimin dhe çmimin e saktë të artikullit.
Pas mbylljes së fazës informuese, Task-Forca do të intensifikojë kontrollet në tregje dhe pika shitjeje, për të verifikuar zbatimin e këtyre detyrimeve. Administrata Tatimore rikujton se mosrespektimi i rregullave do të sjellë penalitete sipas dispozitave ligjore në fuqi.
Ndërkohë, paralelisht po vijon edhe fushata për deklarimin real të të ardhurave nga subjektet që operojnë në sektorin e turizmit: shërbime plazhi, bare e restorante, struktura akomoduese, qiradhënie mjetesh dhe transport ndërqytetas. Duke e cilësuar këtë si një ndër sektorët më të riskuar për evazion, Tatimet kanë hartuar një plan operacional për sezonin turistik 2025, i cili përfshin masa të shtuara kontrolli dhe këshillimi për bizneset në këtë fushë.
Pjesë e këtij operacioni është edhe monitorimi i të ardhurave nga aktivitetet në rrjetet sociale. Administrata ka identifikuar rreth 100 individë të dyshuar për mosdeklarim të të ardhurave të përfituara përmes platformave si META, Facebook, Google apo YouTube. Sipas të dhënave të mbledhura nga llogaritë bankare, shuma totale e padeklaruar kap vlerën e 33 milionë eurove. Tatimpaguesit e përfshirë kanë afat për deklarimin e këtyre të ardhurave deri më 1 prill 2025.
