Raportohet se Princi William po planifikon të ndërmarrë një vendim të rëndësishëm sapo të trashëgojë fronin nga babai i tij, Mbreti Charles III: heqjen e titujve mbretërorë të vëllait të tij, Princit Harry, dhe bashkëshortes së tij, Meghan Markle.
Një burim i brendshëm nga pallati mbretëror ka thënë për mediat britanike se Princi William mban një qëndrim të ashpër ndaj çiftit, të cilët ai i konsideron si tradhtarë ndaj parimeve dhe vlerave të familjes mbretërore. “Ai i përçmon Harryn dhe Meghanin dhe nuk e duron idenë që ata të vazhdojnë të përfitojnë nga statusi mbretëror”, është shprehur burimi.
Çështja është rikthyer në vëmendje pas raportimeve se Meghan ka përdorur ende titullin e saj mbretëror për qëllime personale dhe të markës së saj “As Ever”. Në një podcast të Jamie Kern Lima, u zbulua se Dukesha i kishte dërguar një kartolinë ku ishte nënshkruar si “Lartësia e Saj Mbretërore, Dukesha e Sussex”.
Edhe pse çifti kishte rënë dakord të mos i përdorte më titujt në jetën publike pas largimit nga familja mbretërore, duket se përdorimi i tyre vazhdon të krijojë tensione në pallat. Një mik i afërt me Princin William ka deklaruar se Mbretit Charles i mungon autoriteti për të vendosur kufij të qartë dhe se çifti “synon ta bëjë të vështirë çdo vit të mbetur të jetës së tij”.