Pas rastit të Elbasanit, një tjetër shpërthim me lëndë plasëse është rregjistruar në vend. Ngjarja ka ndodhur në oborrin e një banese në fshatin Fushë-Çidhën të Dibrës.
Policia ka bërë me dije se ngjarja u regjistrua mbrëmjen e 13 korrikut në shtëpinë e shtetasit me inicialet I.P.
Deri më tani nga të dhënat paraprake dyshohet se është hedhur dhe ka shpërthyer një sasi e vogël lënde e dyshuar plasëse. Si pasojë janë shkaktuar vetëm dëme të vogla materiale.
Sa i takon ngjarjes së Elbasanit ku nga shpërthimi me tritol mbeti i lënduar 26-vjeçar Enea Themollari, i cili jetonte përballë apartamentit ku ndodhi shpërthimi, objektiv ishin dy gra që kishin banesën me qira dhe jo 26-vjeçari i cili fatkeqësisht ndodhet në gjendje të rëndë në Spitalin e Traumës në Kryeqytet.