Ambasada e SHBA në Shqipëri ka uruar shqiptarët me rastin e Ditës së Pavarësisë, duke shpërndarë një mesazh nga Sekretari i Shtetit, Marco Rubio.
Në mesazhin e tij, Rubio thekson se partneriteti mes SHBA dhe Shqipërisë është i fortë dhe i bazuar mbi angazhimin për një të ardhme më të sigurt dhe të begatë. Ai nënvizon rëndësinë e aleancës në NATO si themeli i mbrojtjes së përbashkët dhe falënderon Shqipërinë për përpjekjet e saj në fushën e sigurisë.
“Së bashku me forcat ligjzbatuese shqiptare, ne i bëjmë qytetarët tanë më të sigurt, duke u përballur me kërcënimet nga grupet kriminale ndërkombëtare, kartelet e trafikut të drogës dhe aktorë të tjerë që bashkëpunojnë me ta. Vlerësojmë gjithashtu bashkëpunimin në fushën e sigurisë kibernetike dhe përgëzojmë Shqipërinë për hapat e saj në këtë drejtim,” shkruan Rubio.
Sekretari amerikan i Shtetit përfundon mesazhin duke theksuar pritshmërinë për të zgjeruar bashkëpunimin në fushën e sigurisë, lidhjet ekonomike dhe miqësinë e qëndrueshme me Shqipërinë.