Partia Demokratike ka depozituar një ankesë zyrtare pranë Komisionit Qendror të Zgjedhjeve, ku kërkon shpalljen të pavlefshme të zgjedhjeve parlamentare të 11 majit në qarkun e Kukësit dhe përsëritjen e tyre.
Përfaqësuesi ligjor i PD-së, Franci Nuri, ka dorëzuar dokumentacionin përkatës, duke renditur disa shkelje të rënda, që sipas kësaj force politike kanë cenuar integritetin e procesit zgjedhor në këtë qark.
Sipas Partisë Demokratike, ndër shkeljet kryesore janë:
Përdorimi i aseteve shtetërore në funksion të Partisë Socialiste gjatë fushatës;
Shitblerja e votës, një praktikë që PD pretendon se është zhvilluar në shkallë të gjerë;
Parregullsi me votën e emigrantëve, të cilat konsiderohen si cenim i drejtpërdrejtë i rezultatit zgjedhor.
PD e konsideron procesin në Kukës të manipuluar dhe thotë se vullneti i votuesve është deformuar në mënyrë të papranueshme, duke bërë të nevojshme përsëritjen e votimeve.
Komisioni Qendror i Zgjedhjeve pritet të shqyrtojë ankimimin në ditët në vijim, për të marrë një vendim në lidhje me kërkesën për përsëritje të zgjedhjeve në Kukës.