Ambasada e Shteteve të Bashkuara në Tiranë ka lëshuar një apel të qartë përmes një postimi në rrjetet sociale, duke paralajmëruar qytetarët shqiptarë që përdorimi i vizës turistike për të udhëtuar drejt SHBA-ve me qëllim lindjen e fëmijës dhe sigurimin e shtetësisë amerikane për të është i ndaluar dhe përbën shkelje të qëllimit të vizës.
“Përdorimi i vizës turistike për të udhëtuar kryesisht me qëllimin për të lindur në Shtetet e Bashkuara dhe për të siguruar shtetësinë për fëmijën tuaj nuk lejohet dhe mund të çojë në refuzimin e vizës,” thuhet në deklaratën zyrtare të ambasadës.
Përfaqësia diplomatike amerikane i bën thirrje qytetarëve shqiptarë të jenë të sinqertë dhe të saktë në deklarimin e qëllimit të udhëtimit gjatë aplikimeve për viza, duke theksuar se çdo informacion i pasaktë apo keqpërdorim i vizës mund të ndikojë negativisht në mundësitë për pajisje me vizë në të ardhmen.