Qeveria shqiptare ka prezantuar paketën e re “Paqja fiskale”, me synimin për të lehtësuar barrën e borxheve të prapambetura për bizneset dhe për të mbyllur kapitullin e detyrimeve të vjetra ndaj shtetit.
Ministrja e Shtetit për Sipërmarrjen, Delina Ibrahimaj, gjatë një takimi në Elbasan me përfaqësues të bizneseve dhe Kryeministrin Edi Rama, bëri të ditur se kjo nismë do të krijojë një marrëdhënie të re midis bizneseve dhe administratës tatimore.
Sipas saj, borxhet më të vjetra se 10 vite do të fshihen plotësisht, përfshirë edhe interesat dhe kamatëvonesat. Ndërkohë, për borxhet nga 5 deri në 10 vite më parë:
Nëse bizneset paguajnë detyrimin kryesor me një këst të vetëm, do t’u falet 50% e shumës.
Nëse zgjedhin pagesën me këste për 12 muaj, do të përfitojnë falje prej 25%.
Për borxhet më të reja (1-5 vite), të krijuara për shkak të krizave si pandemia, tërmeti apo rritja e çmimeve, do të falen gjobat dhe kamatëvonesat, me kusht që të paguhet detyrimi kryesor.
Ibrahimaj theksoi se kjo politikë synon një ambient fiskal të drejtë dhe të qëndrueshëm, që ndihmon bizneset të përqendrohen te zhvillimi dhe rritja.