Katër persona kanë mbetur të plagosur në ishullin Sitra, në Bahrein, pasi mbetjet e dronëve iranianë të interceptuar ranë mbi zonat e banuara, duke shkaktuar edhe dëme në disa banesa.
Sipas Ministrisë së Brendshme të Bahreinit, incidenti ndodhi pas një operacioni të mbrojtjes ajrore kundër dronëve të lëshuar nga Irani. Fragmentet që ranë në tokë goditën disa shtëpi, ndërsa ekipet e emergjencës mbërritën menjëherë në vendngjarje për të dhënë ndihmën mjekësore dhe për të siguruar zonën.
Pamjet nga vendi i ngjarjes treguan prani të shtuar të autoambulancave dhe forcave të emergjencës, teksa banorët përjetuan momente paniku.
Ky episod është pjesë e tensioneve të vazhdueshme në rajonin e Gjirit Persik, ku gjatë pesë javëve të fundit dronët dhe raketat e lëshuara në kuadër të konfliktit në Lindjen e Mesme kanë shkaktuar viktima, të plagosur dhe dëme materiale në disa shtete.